الاسم: سعد البحيري صحفي وباحث وكاتب وقارئ ... علي ما تفرج 
الصيف هل علينا وبشايره جايه معاه ... حرارة شديده وانقطاع مياه
كل سنة في نفس الميعاد يتكرر الموقف مع انقطاع المياه وضعفها معظم الاوقات علي معظم مناطق المحروسة ومبررات المسئولين هي هي ما بتتغيرش .. الضغط علي الشبكة وزيادة عدد السكان والتوسع في بناء عمارات جديدة طيب ايه الحل ..؟
المشكلة الحقيقية ان الحكومة لما جات تمد شبكات الميه من زماااااااااان اوي يعني كدا قول من ايام فحت البحر كانت عاملة حسابها ان الناس ح تلتزم ببناء العمارات طبقا لمواصفات الحي يعني ارتفاع العمارة مرة ونص عرض الشارع وحسبوا حسبتهم ووصلوا مواسيرهم الرفيعة للمناطق دي لكن اللي حصل ان الناس رفعت عمارات وعملت ابراج مخالفة زي ما بيحصل في فيصل والهرم وغيرها من المناطق التي تحولت مع الزمن الي عشوائيات من الابراج وكمان الناس بدات تبني في اطراف المدن كل دا عمل ضغط علي شبكة المياه اللي هي اصلا صدمانه وعدمانه وما تلاقيش عمارة فيها ميه طول النهار يا دوب ساعتين بعد صلاة الفجر والمية تقول يا فكيك طيب .. نعمل ايه ؟
انا عن نفسي بافكر اشوف نافورة قريبة من البيت واستحمي تحتها كل يوم واهو نوفر للحكومة شوية ونستغل الميه اللي ضايعة في النوافير عمال علي بطال .
طيب ايه رايكم في الميه اللي بتستخدم لري ملاعب الجولف بتاعت ولاد الزوات اظن دي ميه مالهاش اخر وزي ما سمعت ان
الميه المستخدمة في ري ملعب جولف واحد تساوي الميه المستخدمة لري 10 فدادين رز
يا جماعة احنا عندنا النيل ومش لاقيين ميه اومال الشعوب التانية تعمل ايه
ملحوظة : اعتقد والله اعلم ان احنا الشعب الوحيد اللي بيمسك خراطيم الميه كل يوم الساعة خمسة العصر ويبدا يرش الشوارع من غير لازمة ومش عارف ايه السر بتاع الساعة 5 ده في اوروبا والدول المتقدمة يشربون الشاي الساعة الخامسة اما في مصر فيرشون الشوارع كل يوم الساعة خمسة ايه الحكاية يا بشر انا تعبت خلاص
كتبها سعد البحيري صحفي وباحث وكاتب وقارئ ... علي ما تفرج في 07:57 صباحاً ::
